نصيحة فى كلمتين (2) / حلاوة التدبر

نصيحة في كلمتين ( 2 )

متعة التدبر

في الحلقة اللى فاتت اتكلمنا عن التدبر ووصلنا انه واجب علينا

النهاردة عاوز اكلمك عن متعته

ايوة والله له متعة وكمان له حلاوة في القلب لما تحصل على جوائزه

قبل ما تستغرب كلامى تعالى نشوف مثال في قوله تعالى

{وَمَن يَعْمَلْ مِنَ الصَّالِحَاتِ وَهُوَ مُؤْمِنٌ فَلَا يَخَافُ ظُلْماً وَلَا هَضْماً }طه112

ممكن تعدى على الآية دى وانت بتقرأ القرآن لكن تعالى نشوف ممكن تخرج منها بجوائز اد ايه لما نتدبرها

من يعمل من الصالحات

ربنا قال من الصالحات ولم يقل يعمل الصالحات

ربنا خلقنا وهو اعلم بضعفنا واننا لن نعمل كل الصالحات فهو هنا يتحدث عن الانسان الطبيعى اللى بيعمل اللى يقدر عليه من الصالحات

شايف ربنا رؤوف بينا اد ايه

وهو مؤمن

الكلام ده مش موجه لكل العباد .. موجه بس للمؤمنين واخد لى بالك يا مؤمن ؟

فلا يخاف ظلما ولا هضما

الظلم هو انه يعاقبك على ذنبك بأكثر مما تستحق

الهضم هو ان يكافئك على عملك الصالح بأقل مما تستحق

ربنا سبحانه وتعالى بيقول لعباده المؤمنين لا تخافوا من زيادة العقاب ولا من قلة الثواب

خلى بالك

هو في الاول اتكلم عن عمل الصالحات .. بشرى وتفاؤل ولم يتحدث عن الذنوب

ربنا لم يرعبنا بالحديث عن العقاب بل ذكر الصالحات

طيب والذنوب ما كلنا بنعمل ذنوب

شوف يا سيدى رب العزة قال ايه في آية تانية

{وَأَقِمِ الصَّلاَةَ طَرَفَيِ النَّهَارِ وَزُلَفاً مِّنَ اللَّيْلِ إِنَّ الْحَسَنَاتِ يُذْهِبْنَ السَّـيِّئَاتِ ذَلِكَ ذِكْرَى لِلذَّاكِرِينَ }هود114

الحسنات يذهبن السيئات ... مستنى ايه

اذهب سيئاتك وانتظر من المولى الثواب بدون هضم

بالله عليك ألم تشعر بالهدوء والرضا والرغبة في عمل الصالحات ؟

شوفت حلاوة التدبر ؟

أشكرك على سعة صدرك