انت مين فيهم

انت مين فيهم

النوع الأول معارض للقيادة السياسية وشايف ان خطواتها غلط ودايما بيسخر من اى قرار بتاخده ومش شايف لها أى ايجابيات  وبيقول انه بيعمل كدة حبا في الشعب الغلبان وده اختلف معاه واقول له هناك ايجابيات ايضا

النوع التانى شايف ان القيادة السياسية تمام التمام والعيب في الشعب الكسول واللى مش عاوز يشتغل وده ايضا اختلف معاه واقول له ان الشعب مش كله كسول والقيادة السياسية لها قرارات بتخنق الشعب وجايز لها مبرر لكن الرأفة حلوة برضه

النوع التالت ده اغربهم بتلاقيه بيشوف السلبيات بس يعنى مش عاتق حد تريقة لا القيادة السياسية ولا الشعب وشايف كل حاجة سودة وتلاقيه بيشتم في القيادة بحجة انه بيدافع عن الشعب وفى مكان تانى تلاقيه بيشتم في الشعب لانه شعب غبى وكسول .... النوع ده بقى اعتقد انه واحد من عدة احتمالات

- عميل وخاين ومزروع في البلد لهدمها

- متخلف عقليا ومش عارف بيعمل ايه

- انسان تافه بيدور على زعامة وهمية تحت مسمى انه معارض

- حشاش ومش بيجمع

- شخص مش مصرى كاره للبلد عشان عقدة في بلده

- احتمال اخر لا اعرفه .... فكر انت بقى

كل ماسبق من احتمالات تجعلنى احتقر النوع التالت

النوع الرابع هو النوع السوى الذى ينظر الى الايجابيات والسلبيات ويناقشها بعقل محايد والايجابيات قبل السلبيات وربنا سبحانه وتعالى مدح الامر بالمعروف والنهى عن المنكر يعنى الاتنين مع بعض والايجابى قبل السلبى

ياترى انت مين بقى في الانواع الاربعة 

فن الغباء

فن الغباء

الغبى ليس من باع كل ما يملك ليدفعه ثمن هجرة غير شرعية على قارب مجهول المصير معتقدا انه عندما يصل الى الشاطئ سيجد ترحيب من السلطات الاوربية وستنقله بسيارة مكيفة الى كمبوند مؤثث وستجرى له راتب محترم وتوفر له مدارس لاولاده

.

الاغبى منه من يجلس على النت ينعى حظ من مات ويتهم بالغباء من يسأل كيف يكون المهاجر لا يملك قوت يومه وهو قادر على دفع 150  الف جنيه ثمن هجرة خمسة اشخاص ( هو وزوجته وثلاثة من بناته ) قائلا بالمعية شديدة ان المهاجر بيدفع ثمن رمزى والباقى ايصالات أمانة تسدد لاحقا بعد ما المهاجر يستقر في اوربا وكأن صاحب الزورق ها يلف في حوارى روما بعد سنة يلم الغلة من المهاجرين

.

الأغبى من الأتنين هو انا اللى باضيع وقتى ووقتك وانا بأكتب الكلام ده ومعتقد انه ممكن حد يفكر في اللى بأقوله وممكن يشغل عقله

تعالى اشرب قهوة معايا بس اوعى تقعد جنبى تنوح وتولول على حال البلد لانى وقتها ها الزقك على قفاك 

نواح النسوان

نواح النسوان

#مركب_رشيد

اولا اسف على التعبير اللغوى المتدنى

مئات المقالات والبوستات على النت تنوح على غرقى مركب رشيد ولا أدرى ما فائدة النواح وهل هى اول مركب للهجرة غير الشرعية ؟ وهل من نجح في الهجرة لا يستحق النواح

ما هو الفرق بين من ينجح في الهجرة ويدور مذعورا هائما في دول اوربا وبين من يشترى فيزا لأى دولة عربية ويسافر يبحث عن عمل او حتى يجد عمل ويمتص كفيله عرقه

ما الفرق بين هذا المهاجر وبين المحامى والمحاسب الذى يجلس في الخليج يبحث عن عمل ثم يرضى ان يكون عاملا في مطعم او بائعا في بقالة ثم ينام اخر النهار في غرفة تحتوى عشرين فردا مثله

لماذا النواح على مركب رشيد فقط هل لان من بها مات غريقا ؟ وهل من نجح في الهجرة والوصول الى الشاطئ ليس ميتا وهو حى

كم فردا ممن ينوح على النت نبه الحكومة او عمل على الضغط عليها لتوقف نزيف تلك الطاقات المهدرة

بدلا من نواحك على النت ولعن ظروف البلد ابحث عن حل واعمل على ان تكون رأى عام للضغط على الحكومة لتنفيذه

لماذا لا تنادى بانشاء مراكز تأهيل حرفى لهؤلاء الشباب مراكز تعلمهم الميكانيكا والنجارة والكهرباء .... مراكز تعلمهم انتاج الموبيليا لاحياء صناعات دمياط التى تموت

مراكز تعلمهم انتاج صناعات خان الخليلى التى زحف عليها السوريين وسنجد خان الخليلى قريبا نسخة من باب الحارة

مراكز تعلمهم الصناعات الصغيرة ولنقيم وحدات انتاجية متكاملة كما في الصين وكل فرع منهم يصنع جزء واحد من المنتج ويكون هناك مقر للتجميع

لماذا بدلا من نواحك لا تطالب بانشاء مستوطنات في الصحراء كمستوطنات اليهود في فلسطين ... بدلا من بناء مساكن وتجهيزها للعشوائيات ثم نجد من يستلمها يبيع اثاث شقته ثم يقوم بتاجيرها ويذهب للعيش في كوخ صفيح آخر قم ببناء مستوطنة له يزرع او ينتج فيها ويصلح ارضه

مئات الافكار يمكن بها استغلال طاقات الشباب المهدرة بدلا من نواح النسوان

ابسط الاعمال استغل وقت نواحك في عمل هاشتاج على النت يمكن ان يصل للحكومة ويكون نواة لافكار منتجة

#استغلال_طاقة_شباب_الهجرة

#استغلال_شباب_مركب_رشيد

بدلا من نواحك الفاضى اعمل اى حاجة تساعد بيها اللى لسة بيفكر في الهجرة

او لو شايف كلامى مش عاجبك ارميه في الزبالة وكمل نواح

نواح النسوان فهو اسهل 

الولد وأبوه

الولد وأبوه

جلس الشيخ يتسامر مع ولده الصغير الذى يصفه دائما بالمجادل

مالك يا والدى تغيرت ليه ... علمتنى حاجات وقلت لى حاجات وشايفك بدأت تغيرها

زى ايه يا ابنى

طول عمرك تقول لى عامل الناس باصلك الطيب .. اسال عن مريضهم .. ساعد محتاجهم .. جامل في افراحهم واحزانهم .......... حتى لو مفيش منهم مقابل خليك انت الطيب واوعى تزعل لو قابلت منهم جحود او غدر فكل واحد بيعمل باصله والانسان بيطلع اللى جواه

دلوقتى شايفك زعلان من الناس ومعاملتهم معاك

يا ابنى الناس اتغيرت اوى عن زمان وبقى الغالب فيهم الجحود والنكران ... كان زمان ممكن تقابل واحد او اتنين وحشين والاكثرية ناس طيبين محترمين

دلوقتى كل يوم باكتشف ان فلان بقى غريب وباشوف في العيون حاجات كتير وحشة

يا والدى محدش اتغير الناس طول عمرها بتتعامل طبقا لمصلحتها مش طبقا لمعاملتك معاهم بس انت اللى كنت عايش في وهم القيم والمبادئ في زمن لا يعترف الا بالمادة

لا يا ابنى والله الناس كانت محترمة ايه بس اللى غيرهم

المشكلة انى دلوقتى خايف عليك من اللى علمته لك

وانا يا والدى خايف عليك من الوحدة في زمن مش بتاعك

فليرحمنا الله يا ابنى

يا ترى مين فيهم اللى صح

رحم الله الرحال حيا وميتا 

قتلوا أباهم

قتلوا أباهم

جلست على مقعد في احد الحدائق استريح قليلا لاستطيع مواصلة السير وجاءت جلستى بجوار شيخ وقور صامت يرتدى ملابس تدل على ذوق وحالة ميسورة

لكنى لاحظت وكأنه يحادث نفسه

داعبته قائلا ان الحياة تظل رائعة طالما فينا نفس يتردد فلماذا هذا الحزن

وكانى فتحت منفذ لخروج ضغط عصبى يكاد ينفجر

قال :

عشت حياتى كلها اعمل كالآلة التى لا تكل ولا تهد وكان هدفى   التقدم في عملى ليسمح لى بدخل أكبر وفى نفس الوقت اوجه كل ما احصل عليه لاولادى .... اوفر لهم حياة كريمة مريحة

لم يكن الادخار في اولوياتى بل كنت اعتقد ان الادخار الحقيقى هو فيهم وفى تربيتهم في مستوى لائق ولم اكن احرص على ملابس غالية او طعام فاخر لنفسى بل اكتفى باوسطه واقدم اليهم افخره

الحمد لله نعيش مستورين وطوال حياتهم لم يشعروا بحرمان من ملبس او طعام

تعلموا جميعا وتزوج بعضهم ووهنت صحتى فقررت انه قد آن الأوان لأستريح في منزلى خاصة ان لى دخلا يجعلنى اعيش مستورا

اكتشفت للاسف ان تفضيلى لهم واكتفائى بالقليل أصبح مادة للسخرية

نعم يسخرون من اكتفائى بالقليل من طعامى وملبسى .... يسخرون من رغبتى في الراحة وكأن المفترض ان أظل الهث في الدنيا حتى الممات

بالطبع استطيع ان اخرسهم واجعلهم يلتزمون الادب ولكنى حزين

حزين لانى توقعت ان يكون ما فعلته له مردود لديهم دون الحاجة ان اجبرهم عليه

لقد زرعت ارض بور فانبتت نبات لاخير فيه

لقد ضاع العمر هباء

سألنى سؤال واحد وهو هل تعتقد انه عند موتى سيدعو لى احدهم بالمغفرة ام سيتذكرونى ويضحكون منى

لم استطع إجابته وقمت لاكمل مسيرى وانا اخفى دمعة تريد ان تفلت من عينى

قتلوا أباهم ام قتل نفسه دون ان يدرى 

الضمير قبل جدول الضرب

الضمير قبل جدول الضرب

#رسالة_لرئيس_الجمهورية

مطلوب تغيير المناهج للحضانة والابتدائية وحذف كل ما بها من معلومات علمية والاكتفاء فقط بتعليم القراءة والكتابه والدين

نعم الدين فقط ... الدين بمعناه الحقيقى

ليس مهما تعليم الاطفال جدول الضرب والعلوم والجغرافيا

علموهم الدين ... الدين بمعناه الشامل

علموهم معنى الاخلاق معنى الخير والحب علموهم معنى الاحسان والصدق علموهم معنى النخوة والكرامة ... علموهم النور .. نور الحق لو نور قلوبهم عمرهم ما ها يطلع منهم بلطجى والا حرامى او مرتشى

حتى لو الطفل اتسرب من التعليم بعد الابتدائية ها يكون اتعلم معنى الضمير

علموهم الدين الحقيقى الدين مش بس لحية وجلابية

الدين صدق وخير وحب وحسن معاملة الناس ربنا في القرآن امرنا بحسن البيع والشراء امرنا بالاحسان والصدق امرنا بالحب والصدقة امرنا نستقيم

علموا الاطفال الاستقامة ازرعوا في قلوبهم النور مش ها يفيد الطفل يحفظ القرآن من غير فهم معانيه علموه الاول معنى انه يكون انسان على خلق زى نبيه

علموا اطفالنا يعنى ايه يكون عنده ضمير

مش ها تضيع السنين دى والله واللى يستمر في التعليم بعد كدة وهو قلبه نقى طاهر ها يبقى سهل يتعلم جدول الضرب والكيمياء والفيزياء

مش ها نلاقى موظف مرتشى ولا طبيب حرامى ولا حتى بياع خضار جشع

علموا الطفل النور والنور ده هو اساس دينه

علموهم الاخلاق والنخوة والكرم

اذا كنت مقتنع بكلامى ساعدنى يوصل لرئيس الجمهورية

اذا كنت شايف انى باخرف فانا اسف انى ضيعت وقتك 

لحية وجلابية

لحية وجلابية

ربنا يسامحنى لانى نفرت من مسلم .... فعلا نظرت له بنفور .. لكن ليه

كنت باصلى العيد ونظرا لوهن صحتى ولعدم وجود كراسى بالساحة التى نصلى فيها جلست على حجر بجوار المصلى اكبر مع المصلين ومكان جلوسى بالقرب من مدخل المصلى فكنت ارى القادمين ... كنت اشعر بفرحة الصلاة ورؤية اهل بلدى بعد طول غياب عنهم ... رجال مع اطفالهم والبعض يوزع الحلوى على الاطفال

حتى لاح على البعد رجل يرتدى جلباب وله لحية عظيمة وشعر اشعث

رغما عنى نظرت له بامعان .... اللحية غير مهذبة ... وماله سنة

الجلباب يقترب من ركبته ... ميضرش رغم ان السنة ان الجلباب لا يلامس الارض هذا الرجل بالغ قليلا في رفعه حتى وصل ركبته هو حر

لكن ما جعلنى انفر منه رغما عنى هو وجهه .... عابس الوجه بشكل ملحوظ مقطب الجبين وكانه قادم للانتقام ممن قتل زوج خالته

ينظر حوله بقرف شديد وكاننا نرتكب المعاصى جهارا

رغما عنى ادرت وجهى نفورا منه

هل هذا هو الواجهة للمسلم المتمسك بالسنة .... العبوس والتجهم

يجرنا هذا للحديث عن غالب هؤلاء الناس

تراه دائما ينهى عن المنكر ...ممتاز فهذا شيئ مطلوب لكن اين الامر بالمعروف .. اين السنن التى تحبب في اتباعها ... اين تبسمك في وجه اخيك صدقة ... اين تراحموا تحابوا ... اين الموعظة الحسنة

ترى هل شاب ملتحى يرتدى جلباب معتدل ( اسفل الركبة ) بشوش الوجه ياتى اليك ويرغبك في الصلاة خير ام عابس الوجه الذى ياتى اليك يتهمك بالكفر ان لم تذهب معه الى الصلاة ؟

بالله عليك ان رايت رجلا من هؤلاء يسال هل الصورة مع الخروف الاضحية تعتبر حلال ام حرام فماذا ستقول عنه

هل اتبعت كل الفروض وتخشى على الناس الفتنة من الصور مع الاضحية هل انت كذلك متبع للسنة متمسك بها

ارحمونا من تفاهاتكم وعلمونا اسس ديننا ان جهلناه .... ارحمونا من عبوسكم ففى الدنيا ما يكفينا من شقاء .... ارحمونا من الوعيد واعيدوا لنا الامل في رحمة الله ان غابت عنا .... ارحمونا ولا تكونوا كزبانية جهنم فهناك ملائكة الرحمة

كن متبعا للسنة ولكن ليس دائما محذرا من الهلاك ... قليلا من الترغيب والله سيكون اكثر فائدة

فليسامحنى الله وليسامحنا جميعا 

ضحى بالفرحة

ضحى بالفرحة

لو اشتريت الاضحية او لو مش معاك تضحى لكن اشتريت لحمة لولادك

الاضحية تقرب الى الله وممكن تستغل الفرصة في الايام دى وتتقرب اكتر واكتر لله

انشر السعادة بين اللى تقدر عليه من الناس ... انشر الفرحة حتى ولو كانت بسيطة

ضحى بالفرحة

ناس كتير ها تلاقيها بتشتغل في العيد لان الأجر في العيد بالضعف ... ناس كتير ها تعيد في الشوارع

عامل نظافة .. بياع خضار غلبان .. موظف أمن على نادى ... حارس او موظف نظافة على دورة مياه .. وغيرهم كتير وكتير

جنيهات قليلة اهم عنده من قعدته وسط عياله ... فرحتهم بلقمة العيش اهم من فرحتهم بالعيد

فرحهم انت كمان وزود شوية تمن لحمة العيد على قد ما تقدر

وانت رايح توزع اللحمة او انت رايح تفسح عيالك او انت رايح تعيد على قرايبك خلى في جيبك كمية من الفلوس الجديدة على حسب مقدرتك

قرب من الواحد منهم وابتسم بود ... سلم عليه باحترام وانت بتقول له انا جاى اعيد عليك وسيب في ايده ورقة نقود جديدة

اوعى تحرجه قدام الناس وتظهر انك بتديله صدقة ... على صوتك وانت بتقول انا جاى اعيد عليك .... خليك محترم وانت يتحترم فقره وحاجته

ضحى كمان وكمان

ضحى بالفرحة

ضحى بفرحة تزرعها في قلب محتاج مستور

كل سنة وانتم طيبين