قصة حب مزعجة وجايز تكون مقرفة كمان

أنا شخص مزعج جدا وأكيد كتير من اصحابى قرفانين منى جدا

والسبب ايه ؟ تعالوا احكى لكم بعض القصص

بس لو انت عندك وقت كمل القراءة لو مشغول اعمل نفسك مشفتش كلامى وبلاش وجع دماغ لانى ها أرغى كتير

اول قصة كانت مع صديق عظيم من اصدقائى رجل متعلم ويعمل في جهة محترمة وكان رحمه الله يشغل فيها منصبا رفيعا وكان له اصدقاء كثيرين على الفيس بوك وكل يوم الصبح يدخل الفيس بوك يعمل شير لمجموعة صفحات وملصقات بعضها يحمل صفة التسلية والبعض الآخر له صفة دينية او لنقل دعوية وكنت باهزر معاه كتير في ما ينشره من امور التسلية لكن ما يخص الدين كنت مبعرفش ابلعه واسكت فكنت بانبهه لما فيه من خطأ

في الاول كان بيقول انها صفحات شهيرة ومش معقول تغلط وكنت باجيب له المصدر والرواية الصحيحة واحيانا رأى بعض العلماء

بعد كدة اصبح لا يرد على التنبيه او التصحيح لانى كنت باكتب التصحيح في تعليق على البوست نفسه لانى باعتقد ان اللى يقرا البوست من حقه يشوف التصحيح خاصة ان اصحابه كانوا بيثقوا في علمه

اتلهى انا بقى واقول بلاش ازعله واسكت ؟ ابدا ..... اصبحت ارسل له على الخاص التصحيح لما حسيت انه بيزعل من الكتابة علنا

الله يرحمه قبل وفاته بشهور زهق منى ورزعنى واحد بلوك محترم

اتلهى بقى على عينى وابطل العادة المهببة دى ؟ ابدا

.........................

تانى قصة

- من كام يوم عرفت ان صديق لى اختلف مع اهل بيته وبينهم مشاكل ومن ضمنها تطاول من ابنته عليه حتى وصل الامر انه ضربها ومنعها من العمل ورغم ملازمتى لمنزلى لضعف صحتى الشديد الا انى طاوعته وذهبت لمحاولة التوفيق بينه وبين اهله

وهناك قابلت ابنته الشابة وسعدت جدا لانها بدأت كلامى معها بذكر انها تقرأ القرآن وتحافظ على الصلاة وطبعا كان المدخل لها في تطاولها على ابيها من باب الدين والقرآن والحديث الشريف ............ لكن البداية كانت مهببة

فوجئت انها بتعتمد على حديث نبوى مغلوط وبتقول ربنا قال كذا وكذا .... بهدوء قلت لها ان معنى كلامها وقال الله كذا انه من القرآن وهذا غير صحيح وان الكام حديث اللى بتقولهم دول احاديث مكذوبة والصح هو بر الوالدين وحسن المعاملة وهنا بدأت البنت تتحفز شوية وتبقى ردودها هجومية ..... ثم بدأت تقول بعض الآيات وبتفسرها تفسير غريب

يا بنتى الله يرضى عليكى مين بس اللى قال ان هذا هو معنى الآية ؟ تقول قريته بس مش فاكرة امتى ..... طيب تعالى يا حبيبتى بهدوء نفكر شوية ونشوف بالعقل كدة معناها ..... المهم ..... البنت طبعا ركبها الغرور وانها عارفة بتعمل ايه وعارفة كويس في الدين وانها مغلطتش لما اتطاولت على ابوها وانها لن تعتذر لانها حاولت مرة تعتذر له وهو لم يقبل فكرامتها  ( بتنأح ) عليها وهو حر بقى ... يعنى بالعربى يخبط راسه في الحيط ..... طبعا باظت القعدة وبينى وبينكم قلت حلال فيها اللى بيعمله معاها وروحت

................................

تالت قصة

من كام يوم بنت اختى نشرت على الفيس موضوع عن حسن معاملة الزوجة ومن ضمن الكلام جزء على انه حديث نبوى ... دخلت كالعادة انبه واقول يا اخوانا الله يرضى عليكم الكلام ده كلام فارغ ومش حديث وان الاحاديث النبوية فيها موعظة اقوى في حسن معاملة الزوجة يبقى بلاش نجيب الكذب على رسول الله صلى الله عليه وسلم ونقول الصح

فوجئت ببعض اصحابها وبعض الاقرباء فرحانين اوى بالحديث المكذوب وهاتك يا نشر بل وصل ان بعضهم بيحلف انه سمعه من عمرو خالد وكان ده ختم الصلاحية

اتلهى برضه واسكت ابدا .... بحثت ودورت وقلت يمكن السن له احكام وبدات انسى لكن والله طلع حديث فنكوش يظهر واحدة ست كانت واكلة علقة من جوزها راحت مستفة كام كلمة جنب بعض وقالت حديث نبوى

لسة برضه كل لما اشوف واحدة نشرت الحديث اياه ادخل اقول لها بلاش منه الكلام ده والظريف ان ولا واحدة حذفته ... يعنى بالعربى بتقول لى اتلهى انت واسكت

.................

تفتكروا اسكت ؟ لا والله لن اسكت عن حديث مغلوط لانى باحب رسول الله صلى الله عليه وسلم ولن اسكت عن كلام مكذوب عنه ممكن ينتشر ومع الوقت يتوه الصحيح بين الغلط ونلاقى نفسنا بنقول ان اكل البامية بيدخل الجنة وسندوتش السبانخ بينقض الوضوء

ها افضل مزعج واللى مش عاجبه يهبدنى بلوك ويرتاح وينشر براحته عن البامية او حتى المسقعة

بالمناسبة حديث حسن بيقول

اتَّقوا الحديثَ عنِّي إلَّا ما علِمتُمْ فمَن كذبَ عليَّ مُتعمِّدًا فليتَبوَّأْ مَقعدَهُ مِن النَّارِ، ومَن قال في القرآنِ برأيِّهِ ، فليتَبوَّأْ مَقعدَهُ مِن النَّارِ

وبالمناسبة كمان هناك موقع اسمه الدرر السنية ممكن تحط كلمة من الحديث وتبحث والموقع ها يقول لك اذا كان حديث ونوعه ومدى صحته والا كلام فارغ ومالوش اساس

عرفتوا ليه بقى باقول انى مزعج

الاختيار لك يا تستحملنى لو شفت عندك حديث مغلوط وتتحمل تبعته يا تريح دماغك والبلوك افضل 

قصة حب دافئة

قصة حب دافئة

قصة حب من قصص الرحال من قصص إبحاره في بحور النور

مع حبيبة صغيرة ولكنها تفيض بالحنان والحب

ومع اول قصة للرحال مع حبيبته ......قصة يبحر فيها بقاربه المتهالك فى بحر من بحور النور ......مع ذكرياته فى لقائهما المتجدد دوما .... اللقاء الذى يحمل فى كل مرة تجديد للعهد ...عهد الحب .. والنقاء ..والصفاء
قصة اليوم عن حبيبة تعطى لمن يحبها منهجا وطريقا للمضى الآمن ..والسير الثابت الى الهدف المنشود ......قصة اليوم تعطى فيها الحبيبة لمن يحبها طوق النجاة من المهالك ........... كما انها هى السبب فى كتابتى لكم ........كيف ؟
اخوتى فى الله
ابحر معكم اليوم بالقرب من شاطئ بحر من بحور النور .......فقط بالقرب من الشاطئ فرفقا بى ان كان ما وجدته من نور هو بصيص فقط فقاربى متهالك لا يقوى على أن يبتعد عن الشاطئ ...قاربى هو قلبى الذى ضربت جوانبه السنين .....وأصابه من الهرم العمر الحزين

عندما يقسم أحد منا على أمر ما قد حدث فهو يريد التأكيد على حديثه ...خاصة اذا كان هذا الحدث قد تم فى الماضى ... وكلما كان الذى يقسم مشهور عنه الصدق كلما كان تصديقه اقرب الى النفس .......واذا كان الذى يقسم لم يعهد عليه كذب ابدا لكان حرى بنا ان نصدقه من فورنا ............... ولكن اذا كان الذى يقسم هو الله سبحانه وتعالى ..... خالق الصدق والصادقين ..... يقول المولى تبارك وتعالى فى سورة الحجر آية 64
(وَأَتَيْنَاكَ بَالْحَقِّ وَإِنَّا لَصَادِقُونَ (

كما يذكر سبحانه فى سورة الذاريات 5

)إِنَّمَا تُوعَدُونَ لَصَادِقٌ ( 

الذى يقسم هو الله سبحانه وتعالى ...........نعم هو الله الخالق العزيز الجبار

فحبيبتى التى احدثكم اليوم عنها والتى دفعتنى للكتابة اليكم هى سورة العصر
بسم الله الرحمن الرحيم
))وَالْعَصْرِ{1} إِنَّ الْإِنسَانَ لَفِي خُسْرٍ{2} إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ{3{

يقسم الحق سبحانه ....وهل هو فى حاجة لقسم ؟ اذا قال وجبت الطاعة والامتثال على الفور فاذا اقسم فهو يقسم بامر جلل .....ياسميع يا عليم ...يا رحمن يا رحيم رحمتك ياربنا ......القسم من الله يا اخوان ..أريد ان أجرى فى انحاء الدنيا ...أصرخ فى أخوانى : القسم من الله يا اخوان .....انتبهوا ...فلتهتز السماوات والارض ....تضطرب البحار والجبال .....تسجد الجباه ..تسجد القلوب ...تسجد النفوس ....تسجد الارواح ....تسجد الجبال والطير والنبات .......يسجد كل من فى الكون وما فيه 

فالأمر جلل ....نعم جلل وعظيم يقسم ربنا بالعصر وهو ما اتفق اغلب المفسرين على ان الصواب من القول في ذلك: أن يقال: إن ربنا أقسم بالعصر وَالْعَصْرِ اسم للدهر, وهو العشيّ والليل والنهار, ولم يخصص مما شمله هذا الاسم معنى دون معنى, فكلّ ما لزِمه هذا الاسم, فداخل فيما أقسم به جلّ ثناؤه.( الطبرى )

يقسم ربنا وخالقنا يا أخوان ......... خالق الكون والعباد يخبرهم يأمرهم ......اخوتى ان الله تعالى يقسم
والان فلنرى جواب القسم : يقول ربنا تبارك وتعالى ان الإنسان لفى خسر

يا الله يابديع السماوات والارض..... الانسان فى خسر؟ الانسان بمعناها الشامل ...كل البشر فى خسران اكيد اقسم به المولى تبارك وتعالى ...... كلنا خاسرون ؟ نعم الا من رحمهم الله وانار لهم الطريق ويسر لهم المضى فيه ........نجرى ..نهرول بخوف كلنا خاسرون وما هو الطريق ؟...... يرحمنا ربنا فيذكره واضح لا لبس فيه فالناجون من هذا الخسران هم الذين آمنوا فقط الذين آمنوا .......ولكن قفوا انتظروا هل يكفى الآيمان فقط ؟ بين الله لنا صفات الناجين والصفات معطوفة على الذين آمنوا 

الذين عملوا الصالحات عملوا كل عمل صالح خالص لوجه الله 

وماذا ايضا هل هناك المزيد ؟ نعم لابد وان يتواصوا بالحق قال المفسرين الحق هو التوحيد
وماذا ايضا ؟ تواصوا بالصبر ......أى صبر هل هو ما تعارف الناس عليه من الصبر عند وقوع النوازل او المكاره ؟......يعجبنى تعريف ابن القيم للصبر فهو تعريف جامع يقول الصبر هو الصبر على المأمور والصبر عن المحذور والصبر عند وقوع المقدور

اخوتى فى الله .....كلنا موحدون .. وبالله مؤمنون .....فهل لنا بالتواصى بالصبر
الصبر على المأمور فى اتباع الطاعات والصبر على ادائها وهو فى راى ابن القيم من اشد انواع الصبر ........هل لنا بالتواصى بالصبر عن المحذور وان يبصر بعضنا بعضا ان راى منه ميلا لامر محذور يفعله وهو عنه لاهى .......هل لنا ان ان نتواصى بالصبر فى المكاره

يقول الامام الشافعى رحمه الله لو تدبر الناس هذه السورة لوسعتهم

كما ذكر الطبراني من طريق حماد بن سلمة عن ثابت عن عبيد الله بن حصن قال كان الرجلان من أصحاب رسول الله صلى الله عليه وسلم اذا إلتقيا لم يفترقا إلا على أن يقرأ أحدهما على الآخر سورة العصر إلى آخرها ثم يسلم أحدهما على الآخر

هل لنا ان نتبع امر الخالق العظيم لننجو مما اقسم به من الخسران 

اخوتى فى الله تعلمون الآن لما بدات بهذه السورة ......بهذه المحبوبة 

اخوتى هل آن لنا ان نتمم صفات الناجين ونكون ممن ذكرهم المولى سبحانه يتواصون بالحق والصبر 

اللهم اجعلنا جميعا من عبادك الذين آمنوا ويعملون الصالحات ويتواصون بالحق ويتواصون بالصبر اللهم آمين 

والى قصة اخرى من قصص حب البحار .......البحار فى بحور النور
القاكم على خير واترككم فى رعاية الله وامنه
والسلام عليكم ورحمة الله وبركاته

امام مسجد منافق

كلام مش ها يعجب حد

ومش بعيد يقولوا عنى علمانى ... أو العكس يعنى متشدد

احنا شعب متدين اوى لكن يعيبه انتشار الجهل باصول دينه ... ازاى ؟

يعنى بنحب الدين اوى ولكننا لا نتصرف بما ينادى به الدين الا في القشور والمظاهر حتى وصل الامر الى التمسك ببعض النوافل والتفريط في الفروض

صلاة الفرض ممكن تلاقى صف او صفين في المسجد لكن صلاة النافلة تلاقى عشرات الآلاف

المشكلة بقى في عشرات الآلاف دول .... ليه

كان فيه واحد بيصلى بالناس التراويح في مسجد القائد ابراهيم في اسكندرية وكنت تلاقى الشوارع مقفولة من كتر الناس اللى بتصلى وراه ويا سلام على اللى كان بيعيط اوى وهو بيدعى معاه بالهلاك على ولاد الكلب الامريكان واللى معاهم وربنا يخسف بيهم الارض وخلافه

يوم ورا التانى والناس بتزيد والكل شايف انه شيخ كبير ومتشحتف يا عين امه عشان الاسلام والدين واللى مش بيصلى التراويح ورا الشيخ حاتم يبقى مش بيصلى

الشيخ حاتم نشر تصريحات بيقول انه بيصلى السنة دى في امريكا وطبعا ها يتشحتف هناك في الدعاء للى سمح له بالصلاة والهروب من بلد القمع والانقلاب

الفكرة بقى في اللى كان بيصلى وراه هنا في مصر لما يلاقيه شيخ كداب او منافق مرة الامريكان ولاد كلب ومرة الامريكان حلوين

حاجة من اتنين ا اما ها يقول ان الشيوخ كلهم كدابين

يا اما ها يفتكر ان من اساسيات الدين نفاق الغير  طالما فيها مصلحة 

والاتنين مصيبة

لو قلنا ان الدولة لا ينبغى ان تسمح بالامامة الا لمن يجتاز اختبارات من الاوقاف او من الازهر ها نسمع اعتراضات كتير زى ما بيعترضوا كدة على منع الاعلانات الفاحشة

المصيبة انك بتحاول ترجع الثقة في رجل الدين .... بتحاول ترجع احترام المسلم الجاهل باساس دينه ..... بمن ياخذ عنه دينه

اوعى تسيبه لمتشدد يحوله لداعشى مستقبلى .... ولا تسيبه لمنافق يحوله لحرامى شرعى !!!

زى ما بنادى بتحسين التعليم للاطفال بحسن اختيار المدرس

تعليم الكبار اهم باختيار الامام الصحيح

امام يعلم الناس حسن الخلق والاستقامة والرحمة والصدق والامانة

مش امام يتشحتف وبعدها يطلع نصاب 

قصص حب عنيفة جدا

قصة حب عنيفة جدا

لا ادرى متى احببتها ولا متى صارحتها بحبى ولا متى بدأت تبادلنى بحب اقوى من حبى

كل ما أعرفه انى اصبحت متيما بها وكلما التقيتها تأخذنى في احضانها بحنان فتستكين روحى عشقا وتبدأ هى في استلام قلبى بين يديها تضخ فيه من حبها الكثير

أراها نبعا من ينابيع الحب المتجدد اللامحدود ... حنان ينتزعنى م دنياى ويحلق بى في آفاق من النور

قبلاتها ليست كقبلات العاشقين بل هى اشد قوة وتأثرا فهى تقبل قلبى مباشرة

أقسم بالله انى أحبها ولا أخجل من الاعتراف بحبى لها أمام الجميع بل أفخر بهذا الحب

حبيبتى هى سورة آل عمران

دعونى احدثكم عن احدى قبلاتها التى ارسلتها مباشرة الى قلبى في رسالة منها

يقول المولى عز وجل

الم{1} اللّهُ لا إِلَـهَ إِلاَّ هُوَ الْحَيُّ الْقَيُّومُ{2} نَزَّلَ عَلَيْكَ الْكِتَابَ بِالْحَقِّ مُصَدِّقاً لِّمَا بَيْنَ يَدَيْهِ وَأَنزَلَ التَّوْرَاةَ وَالإِنجِيلَ{3}

انظر الى الآية الثالثة ... كلمتان قد تبدو كل منهما مشابهة للأخرى ولكن لا فالله عز وجل لا يقول كلمة تستطيع استبدالها بمرادف لها بل هى كلمات محكمة كل واحدة في موضعها

نزل القرآن .... أنزل التوراة والإنجيل

ما الفرق بين نزل وانزل

نزل تقال في حالة الإنزال المتقطع ..... انزل تقال في حالة الإنزال دفعة واحدة

ستجد القرآن كله يتحدث عن الانزال لكتب الله بهاتين الكلمتين وكل واحدة منهما تدل على طريقة النزول

القرآن نزل على دفعات طوال بعثة الرسول صلى الله عليه وسل

اسمع هناك من يعترض فهناك آية واحدة تقول عن القرآن انه أنزل فهل اختل النظام

ابتسم  وأقول حاشا لله بل تلك الآية تكشف التباس حادث في نزول القرآن في شهر رمضان ... أنظر معى

قول المولى عز وجل

{شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ ....{  البقرة 185

كيف يكون نزول القرآن في شهر رمضان ونحن نعرف انه نزل طوال سنوات طويلة وفى شهور مختلفة وليس في رمضان فقط

تعود حبيبتى لتعطينى احدى قبلاتها وتقول انظر للكلمة فهى انزل اى انه نزل دفعة واحدة في رمضان .... اى نزل من مكانه المحفوظ فيه الى السماء الدنيا فقد نزل في هذا الشهر الكريم الى السماء دفعة واحدة لينزل على دفعات بعدها الى الدنيا

ترى هلى علمتم الآن مدى حبى للسورة ومدى حبها لى والى اى مدى اغيب معها في رسائل الحب النورانية

كلمتين فقط استغرق حوارى مع حبيبتى  عنهما اياما طويلة

والى رسائل حب أخرى لنا لقاء قادم

أجراس ودخان / الجبل

أجراس ودخان / الجبل

بالأمس اطلقت احدى القاطرات دخانها بقوة وكأنها قد نفذ صبرها من الانتظار متأهبة للرحيل .... بعدها بدقائق انطلق جرس خفى فنفثت دخانها بقوة وبدات حركتها وهى تطلق صفارتها وكأنها عويل طويل ... فداخلها تحمل روحا زكية في رحلتها الأبدية

انطلقت القاطرة تحمل روح عمى الكبير في رحلته الحقيقية .. رحلته الى يوم الحساب

أخيرا استراح القلب الكبير من شقاء الدنيا وانطلق في رحلته عسى ان يلقى الأحبة

انهار الجبل اخيرا تحت ضربات القضاء بعد ان تحمل لسنوات ضربات القدر

الجبل الشامخ الذى على مدار سنوات عانى من آلام فراق احبته الواحد تلو الآخر

اخوته .... زوجته .. اثنين من ابنائه ... كان يقف على القبور مودعا شامخا كالطود

يودعهم بكلمات تدل على ما بداخله من حزن عظيم

أذكره يوم ودعنا ابى يقف على القبر قائلا " لاول مرة نفترق يا حاج عبده من ستين سنة " فقد كانا كالتوأمين رغم اختلاف العمر رحمهما الله

رحل عمى الكبير الجبل الشامخ وآخر من كنت انحنى له مقبلا يده كلما قابلته

رحل آخر جيل الآباء ... رحل آخر من كنا في حضرته كالاطفال رغم مشيب رؤوسنا نتحدث بالهمس .. نتحرك بحساب ... لا تفارق عيوننا وجهه البشوش خوفا من ان نغضبه بفعل غير محسوب

انطلقت قاطرته أمس وما يؤلمنى انى لم احضر الصلاة عليه ولم اقبل جبينه قبلة الوداع لوهن صحتى

رحم الله عمى الكبير الحاج محمد العتبانى  ورحم الله والدى

رحم الله الرحال حيا وميتا 

من دروس الحياة 1

من دروس الحياة / تخاريف الرحال

كانت اول مرة اسافر فيها للخارج سنة 91   وكنت مسافر وقتها المانيا اتدرب في شركة كبيرة هناك وطبعا كنت مبهور بالحياة الغربية وعاوز اعرف كل حاجة عن طبيعة حياة افرادها وبعدها اصبحت واحد من مستشارين الشركة دى في الشرق الاوسط وده كان بيخلينى اسافر لهم اكتر من مرة في السنة واقضى هناك فترات متفاوتة واتعامل مع بعض المديرين الكبار فيها

واحد منهم كانت علاقتى بيه اتحولت لصداقة وكنت باساله كتير عن حياته واسلوبه مع زوجته وولاده وكان وقتها حاجات كتير باستغربها وارفضها كرجل مسلم

من ضمنها يوم باسأله عن زوجته وليه مش موجودة في الشركة حيث انها كانت تعمل معنا فقال لى ببساطة انها في اجازة اسبوع لرحلة مع اصدقائها في فرنسا وانه بيقوم بعملها في المنزل من غسيل وكوى ملابس الاولاد وطبخ وغيره

استغربت وقتها جدا انه موافق على سفرها لوحدها تتفسح ولفترة طويلة نسبيا

قال لى ان الاجازة دى مهمة جدا لها لانها بتخليها فريش وترجع لبيتها وشغلها بحماس وروح جديدة .... وقتها لم اعلق وان كنت في داخلى ارفض هذا المبدأ

دلوقتى بعد ما كبرت حسيت اد ايه الراجل ده كان صح وان الزوجة محتاجة من وقت للتانى تخرج من دائرة البيت والمسئوليات وهموم الحياة وده مش بيتم الا بالبعد عن دائرة اسرتها لبعض الأيام

المشكلة بقى في مراتى

احيانا لما الاقيها متعصبة او متضايقة اقترح عليها تزور اختها مثلا في نفس المدينة لساعات او تزور والدتها في اسكندرية لايام تغير جو لكنها بتعتبر ده نوع من انى مش مستحمل عصبيتها وعاوز اخلص منها !!!!

عجيب اوى امر الستات 

اتباع السنة

اتباع السنة

اتبع الشيخ سنة نبيه في محاولته ان يكون لها السند والسكن والرحمة

اتبع الشيخ سنة نبيه في ان يدعمها ويقويها بقوته لا ان يستقوى عليها

ملحوظة : ماسبق هو خلاصة المقال التالى ان رايته طويلا

كثيرا ما نرى رجال تتبع السنة وتعتقد ان اتباع السنة اهمه هو لبس ثوب قصير واطلاق اللحية ومعاملة الناس بوجه متجهم

صاحبنا الشيخ اتبع السنة في جزئية اخرى .... اتبع السنة مع زوجته

توقف كثيرا عند قوله صلى الله عليه وسلم " حتى اللقمة يضعها في فىّ امرأته "

لم يقل يحمل الزاد لاهله .. لم يقل يطعم زوجته .. لكنه قال يضع اللقمة في فمها ... الله

ليس التعبير عن الحب بالورود او باغانى عبد الحليم ... منتهى الرقة ان يطعمها في فمها بيديه

اتبع الشيخ السنة مع زوجته .. يمسح عن جبينها الغبار بيديه ان قامت بتنظيف منزلهما وهو يدعو لها بالصحة والعافية فتبتسم وتستمد من مشاركته القوة

يدخل عليها مطبخها وهى وسط دخان الطعام ويقدم لها شربة ماء بارد مع ابتسامة ودعاء ان يعينها الله

اتبع الشيخ سنه نبيه في الرفق بزوجته والتعبير عن حبه لها بطرق بسيطة حتى انه وهو الذى لا يتناول افطار يجلس معها في افطارها ويحرص ان يطعمها لقمة واحدة بيديه وهو يذكرها بحديث المصطفى فيتضاحكان

اتبع الشيخ سنة نبيه في محاولته ان يكون لها السند والسكن والرحمة

اتبع الشيخ سنة نبيه في ان يدعمها ويقويها بقوته لا ان يستقوى عليها

رحم الله الرحال حيا وميتا