قصة حب مزعجة وجايز تكون مقرفة كمان

أنا شخص مزعج جدا وأكيد كتير من اصحابى قرفانين منى جدا

والسبب ايه ؟ تعالوا احكى لكم بعض القصص

بس لو انت عندك وقت كمل القراءة لو مشغول اعمل نفسك مشفتش كلامى وبلاش وجع دماغ لانى ها أرغى كتير

اول قصة كانت مع صديق عظيم من اصدقائى رجل متعلم ويعمل في جهة محترمة وكان رحمه الله يشغل فيها منصبا رفيعا وكان له اصدقاء كثيرين على الفيس بوك وكل يوم الصبح يدخل الفيس بوك يعمل شير لمجموعة صفحات وملصقات بعضها يحمل صفة التسلية والبعض الآخر له صفة دينية او لنقل دعوية وكنت باهزر معاه كتير في ما ينشره من امور التسلية لكن ما يخص الدين كنت مبعرفش ابلعه واسكت فكنت بانبهه لما فيه من خطأ

في الاول كان بيقول انها صفحات شهيرة ومش معقول تغلط وكنت باجيب له المصدر والرواية الصحيحة واحيانا رأى بعض العلماء

بعد كدة اصبح لا يرد على التنبيه او التصحيح لانى كنت باكتب التصحيح في تعليق على البوست نفسه لانى باعتقد ان اللى يقرا البوست من حقه يشوف التصحيح خاصة ان اصحابه كانوا بيثقوا في علمه

اتلهى انا بقى واقول بلاش ازعله واسكت ؟ ابدا ..... اصبحت ارسل له على الخاص التصحيح لما حسيت انه بيزعل من الكتابة علنا

الله يرحمه قبل وفاته بشهور زهق منى ورزعنى واحد بلوك محترم

اتلهى بقى على عينى وابطل العادة المهببة دى ؟ ابدا

.........................

تانى قصة

- من كام يوم عرفت ان صديق لى اختلف مع اهل بيته وبينهم مشاكل ومن ضمنها تطاول من ابنته عليه حتى وصل الامر انه ضربها ومنعها من العمل ورغم ملازمتى لمنزلى لضعف صحتى الشديد الا انى طاوعته وذهبت لمحاولة التوفيق بينه وبين اهله

وهناك قابلت ابنته الشابة وسعدت جدا لانها بدأت كلامى معها بذكر انها تقرأ القرآن وتحافظ على الصلاة وطبعا كان المدخل لها في تطاولها على ابيها من باب الدين والقرآن والحديث الشريف ............ لكن البداية كانت مهببة

فوجئت انها بتعتمد على حديث نبوى مغلوط وبتقول ربنا قال كذا وكذا .... بهدوء قلت لها ان معنى كلامها وقال الله كذا انه من القرآن وهذا غير صحيح وان الكام حديث اللى بتقولهم دول احاديث مكذوبة والصح هو بر الوالدين وحسن المعاملة وهنا بدأت البنت تتحفز شوية وتبقى ردودها هجومية ..... ثم بدأت تقول بعض الآيات وبتفسرها تفسير غريب

يا بنتى الله يرضى عليكى مين بس اللى قال ان هذا هو معنى الآية ؟ تقول قريته بس مش فاكرة امتى ..... طيب تعالى يا حبيبتى بهدوء نفكر شوية ونشوف بالعقل كدة معناها ..... المهم ..... البنت طبعا ركبها الغرور وانها عارفة بتعمل ايه وعارفة كويس في الدين وانها مغلطتش لما اتطاولت على ابوها وانها لن تعتذر لانها حاولت مرة تعتذر له وهو لم يقبل فكرامتها  ( بتنأح ) عليها وهو حر بقى ... يعنى بالعربى يخبط راسه في الحيط ..... طبعا باظت القعدة وبينى وبينكم قلت حلال فيها اللى بيعمله معاها وروحت

................................

تالت قصة

من كام يوم بنت اختى نشرت على الفيس موضوع عن حسن معاملة الزوجة ومن ضمن الكلام جزء على انه حديث نبوى ... دخلت كالعادة انبه واقول يا اخوانا الله يرضى عليكم الكلام ده كلام فارغ ومش حديث وان الاحاديث النبوية فيها موعظة اقوى في حسن معاملة الزوجة يبقى بلاش نجيب الكذب على رسول الله صلى الله عليه وسلم ونقول الصح

فوجئت ببعض اصحابها وبعض الاقرباء فرحانين اوى بالحديث المكذوب وهاتك يا نشر بل وصل ان بعضهم بيحلف انه سمعه من عمرو خالد وكان ده ختم الصلاحية

اتلهى برضه واسكت ابدا .... بحثت ودورت وقلت يمكن السن له احكام وبدات انسى لكن والله طلع حديث فنكوش يظهر واحدة ست كانت واكلة علقة من جوزها راحت مستفة كام كلمة جنب بعض وقالت حديث نبوى

لسة برضه كل لما اشوف واحدة نشرت الحديث اياه ادخل اقول لها بلاش منه الكلام ده والظريف ان ولا واحدة حذفته ... يعنى بالعربى بتقول لى اتلهى انت واسكت

.................

تفتكروا اسكت ؟ لا والله لن اسكت عن حديث مغلوط لانى باحب رسول الله صلى الله عليه وسلم ولن اسكت عن كلام مكذوب عنه ممكن ينتشر ومع الوقت يتوه الصحيح بين الغلط ونلاقى نفسنا بنقول ان اكل البامية بيدخل الجنة وسندوتش السبانخ بينقض الوضوء

ها افضل مزعج واللى مش عاجبه يهبدنى بلوك ويرتاح وينشر براحته عن البامية او حتى المسقعة

بالمناسبة حديث حسن بيقول

اتَّقوا الحديثَ عنِّي إلَّا ما علِمتُمْ فمَن كذبَ عليَّ مُتعمِّدًا فليتَبوَّأْ مَقعدَهُ مِن النَّارِ، ومَن قال في القرآنِ برأيِّهِ ، فليتَبوَّأْ مَقعدَهُ مِن النَّارِ

وبالمناسبة كمان هناك موقع اسمه الدرر السنية ممكن تحط كلمة من الحديث وتبحث والموقع ها يقول لك اذا كان حديث ونوعه ومدى صحته والا كلام فارغ ومالوش اساس

عرفتوا ليه بقى باقول انى مزعج

الاختيار لك يا تستحملنى لو شفت عندك حديث مغلوط وتتحمل تبعته يا تريح دماغك والبلوك افضل