ربنا لما بيوعد

ربنا لما يوعد

اولا تعريف الفرق بين الهم والغم والكرب

الهم هو الحزن لضرر قادم او متوقع والغم هو الحزن لضرر وقع والكرب هو اشتداد الحزن مع ضيق الصدر

يقول الحق تبارك وتعالى في سورة الأنبياء

وَذَا النُّونِ إِذ ذَّهَبَ مُغَاضِباً فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ{87}

انظر الى قول الله بعدها مباشرة

فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ {88}

لم يذكر الله انه اكتفى بالاستجابة لنبى الله يونس بل وعد ايضا بانه سينجى من الغم المؤمنين ... يقول المولى عز وجل وكذلك ... بنفس الطريقة

المطلوب فقط تكون مؤمن وتدعى بالدعاء وربنا وعد بالنجاة

وربنا لما بيوعد بيوفي  

حرامى وسعيد

حرامى وسعيد

سألنى ابنى سؤال قد يبدو بديهيا لدى الكثيرين

لماذا نجد أشخاص يعيشون في سعادة وغنى رغم انهم يعصون الله فلا تجد بينهم مبتلى بمرض او فقر او تعاسة .. لماذا نجد الحرامى الذى يسرق الملايين ويعصى الله في خمر أو زنى او غيره يعيش في سعادة دون منغصات

ونجد الرجل المستقيم يصلى ويخشى الله في كل أموره يعيش في ضيق ومرض وتمضى حياته في صعوبة شديدة بين ابتلاء بكثير من منغصات الحياة

الاجابة ببساطة ان هناك اقدار للرزق قدرها الله على الناس واقدار للابتلاء أما الحساب النهائى فيكون هناك يوم أن يقف الجميع أمام ملك الملوك

انظر للآية في قوله تعالى

{وَلَوْ يُؤَاخِذُ اللَّهُ النَّاسَ بِمَا كَسَبُوا مَا تَرَكَ عَلَى ظَهْرِهَا مِن دَابَّةٍ وَلَكِن يُؤَخِّرُهُمْ إِلَى أَجَلٍ مُّسَمًّى فَإِذَا جَاء أَجَلُهُمْ فَإِنَّ اللَّهَ كَانَ بِعِبَادِهِ بَصِيراً }فاطر45

استمر يا ولدى في خشية الله ومراقبة اعمالك فما كانت الدنيا الا دار اختبار سواء كان بابتلاء او بنعمة ولكل منا جزاء يوم الحساب 

قصص حب غبية

قصص حب غبية

أخذت جولة في صندوق الرسائل على الفيس بوك أقرأ في رسائل الأصدقاء

ليس كل الأصدقاء بل الأصدقاء السابقين والسابقين هنا تعنى من لم يعودوا أصدقاء على الفيس بوك  وغالبيتهم قاموا بعمل بلوك لى  والبعض اكتفى بحذفى من قائمته

استرجعت ذكرياتى معهم وتذكرت اسباب غضبهم منى الذى دفعهم الى رغبتهم في عدم رؤية اسمى حتى

مجموعة منهم من مؤيدى مرسى ويرى كل منهم انى قد خسرت دينى لانى لا أؤيد الرئيس المسلم والأمل في دولة الخلافة ودى مجموعة مش مهمة ويفصل بينا رب العباد يوم الحساب

مجموعة منهم من الثوار ... بس معنى كلمة ثائر عندهم هى السخرية ونقد كل ما تفعله الدولة المصرية وجيشها على سبيل المثال بعض من لم يقم بعمل حظر لى واخذت جواة في صفحاتهم وجدتهم يسخرون بشدة من جيش الكحك والغريبة في نفس توقيت وصول حاملة المروحيات ... لم يرى الا الكحك لانه لا يريد الا السخرية

المجموعة دى حاولت اناقشهم في الفرق بين النقد وبين رفض كل شيئ والبحث عن تشويه اى تقدم وان معنى الثائر هو ان يكون باحث عن التقدم وليس مجرد البكاء على عيوب من وحى خياله او حتى سلبيات حقيقية .... الاسهل كان عمل حظر او حذف للراجل المزعج ده

المجموعة الثالثة كانت اغربهم على الاطلاق

واحد منهم نشر مقالا لكاتبة فاجرة ... ايوة فاجرة ... قالت فيه ان ( كل البنات ) الان مشكوك في عذريتهم وسخرت من الشاب الذى يبحث عن عذراء ليتزوجها لان ( كل ) البنات في علاقات مع الشباب سواء بعقود عرفية او بدون وفى ليلة الزفاف ما اسهل تركيب اغشية بكارة صناعية وقد بينت انواعها وطرق تركيبها

الغريب انى وجدت بعض البنات معجبة جدا بالمقال بل وان بعضهم لم يكتفى بعمل اعجاب بل كتب تعليقات تؤيد ما جاء في المقال

ولما قلت عيب اختشوا زعلوا جدا ودافعت البنات عن هذا الشاب الذى نشر مقالة الفاجرة على صفحته وقالوا انى ادفن راسى في الرمال ... اه والله البنات قالت كدة

ولما صممت على انه عيب كدة حذفونى

ما علينا ... الغريب انى كنت بحبهم كبناتى واخوتى وابنائى والله ... اشاركهم جميعا مشاكلهم ومتاعبهم واهتم بهم كانهم من اهلى

مش زعلان والله من غبائى لحبهم بل انى ببساطة افلسف الأمر على انى لم اكن غبى بل انا مجرد رجل طيب !!!!

ترى هل اصدقاء الفيس بوك اصدقاء فعلا ؟ 

قصتى مع الفتة وشيوخها

قصتى مع الفتة وشيوخها

كان زمان بيقوم بعض الميسرين ماديا بعمل ما يسمى ليلة لله ويجيبوا فيها بعض المشايخ تذكر وتحكى بعض القصص الدينية الغرض منها الموعظة ومش مهم بقى صحة القصة ولا مصدرها المهم ان الناس تندهش من القصة ومن تدابير الله مع ابطالها وكرامة اصحابها

وكان الشيوخ دول بتتنافس في تحسين القصص واضافة شوية بهارات حتى تزيد شهرتهم وتزداد بالمقابل ليالى الفتة

ومن هنا جاء تعبير شيوخ الفتة ..... دلوقتى اصبحت الفتة هى قنوات التليفزيون وللاسف هناك شيوخ فته مشهورين جدا احدهم هو عمر عبد الكافى

من كام يوم طلع بتفسير طبى للصيام وكرات الدم البيضاء وعدد أيام الصيام وكان الالتزام بالصيام ها يزيد لما يخترع سبب طبى ورغم نفى عدد من الاطباء لمزاعمه

الا انه يظل الاقوى ولسان حال الكثيرين يقول ها تعرفوا اكتر من الشيخ ؟

اليوم بقى سمعت حديث لشيخ الفتة بيقول ان العمر بيطول ببر الوالدين وبمنتهى الثقة بيقول انه حديث نبوى

الفتة المرة دى حلوة برضه لان هناك حديث عليه خلاف بيقول لايرد القضاء الا الدعاء ولا يزيد العمر الا البر .... البر غير بر الوالدين

ماعلينا مش ها نقول وجه خلاف العلماء ولا اراء المفسرين الذين ضعفوا الحديث لمعارضته بما هو ثابت من احاديث اخرى وتفسيرات لبعض الآيات

حاولت اصلح للشيخ المعلومة على المواقع التى نشرت المقطع دون جدوى ..... الفتة طلعت اقوى

طبعا ناس كتير ها تقول لى انت ها تعرف اكتر من الشيخ ؟ ها اقول لهم ابحث بس وانت تعرف

والله مش شايف فرق بين شيوخ الفتة وبين الشيعة الاوائل اللى اخترعوا احاديث كتير مكذوبة تؤيد مذهبهم لغاية ما بقى في الدنيا ملايين الشيعة بدين جديد على يقين بصحته وبيكفرونا كمان

ربنا يكفينا شر الفتة وشيوخها

يحيا العدل / يسقط البتنجان

يحيا العدل / يسقط البتنجان

كلنا فاكرين عبارة ساخرة قالها ممثل زمان وهى " العلم لا يكيل بالبتنجان "

انا بقى باقول العدل لا يكيل بالبتنجان .. !!  ليه ؟

على خلفية رد فعل الناس على قرار قاضى في موضوع الجزيرتين افتكرت شوية ردود افعال على القضاء

القضاء مسيس وبيعمل اللى الحكومة عاوزاه .. ده كلام ناس كتير في مواضيع كتير وعلى سبيل المثال

التحفظ على اموال ابو تريكة ... القضاء ابن جزمة

رد اموال ابو تريكة .... القضاء عادل ويحيا العدل

محاكمة احمد عز والبحث في ثروته .... يحيا العدل

رجوع احمد عز يطلع لنا لسانه باعلانات بالملايين .... قضاء ابن جزمة

تعرية سيدة في المنيا من مجموعة غاضبين .... اين القضاء واين الحزم

حبس فتاة خلعت ملابس دكتورة في الجامعة وصورتها .... البنت من الحرائر والقضاء ظالم

هذا هو العدل الذى يكيل بالبتنجان ... العدل يكيل بالأهواء .. بالمصالح .. رغم ان العدل لابد وان يكون على اسس ثابتة

يحيا العدل ... ويسقط البتنجان ..... لكن اوعى تسقط المسقعة عشان تكون ثورى ومن الأحرار 

قصة ومعلومة سريعة

قصة ومعلومة سريعة

امرأة وزوجها تسكن فى غرفة وفى الغرفة المجاورة تسكن أم الزوج

كان الزوج يعود لغرفته متأخرا كل ليلة

الأم كانت تظل أرقة كل ليلة وتخرج على فترات تنظر لباب غرفة الابن

اذا وجدت الحذاء على بابه علمت بعودته فتحمد الله وتذهب للنوم

علمت الزوجة بما تفعله ام زوجها

كانت كل ليلة تضع حذاء زوجها على الباب لتعتقد الأم بعودته فتهدأ ويطمئن قلبها

هذا نوع من أنواع الإحسان

أنواع الاحسان :

في الفقه ( ان تعبد الله كأنك تراه فإن لم تكن تراه فهو يراك )

في اللغة قسمين

الاول : الانعام على الغير

الثانى : الفعل الحسن فيكون قدوة لغيره

وفى القسمين يقوم بالاحسان دون انتظار مكافأة من المحسن اليه 

كومبوند وثلاث حيوانات

كومبوند وثلاث حيوانات

من كتر اعلانات الكومبدوند والحق احجز في كومبوند .. خصوصية وحراسة وحمامات سباحة ومطاعم و.. و ... سالت نفسى هو ليه المصريين عاوزين يعيشوا في كومبوند

هل السبب في الخصوصية ؟ البعد عن الآخرين ؟ طيب ما انا عشت في السعودية في عمارة حوالى عشر سنين والله ما اعرف اسم جارى والمرة الوحيدة اللى قال لى سلام عليكم كانت وانا بانقل لعمارة تانية .... وانا شايف ان ده عيب كبير مش ميزة

هل السبب الرغبة في التواجد في مكان راقى ؟ طيب ما هو طوال سنين كانت الزمالك مثلا حى راقى ومحدش قال نقلبها كمبوند

هل السبب هو الامن ؟ لا اظن

اعتقد ان السبب ان الناس بتخاف من بعض ... بتخاف من الحسد ... محدش عاوز جنبه حد اقل منه ليحسده ... الكل فاكر انه لما يسكن جنب الغنى ها يبقى في امان من الحسد والقر ان الكل شايف ان محدش بيحب الخير لحد

مع ان الاساس " لا يؤمن احدكم حتى يحب لاخيه ما يحب لنفسه "

انا بقى طول عمرى نفسى اعيش في كمبوند من نوع خاص

منزل من غرفة واحدة وصالة واسطبل .... أيوة اسطبل فيه ثلاث حيوانات بحبهم جدا

حصان وبقرة وكلب

اكتر ثلاث حيوانات باحس بالسكينة لما ابص في عيونهم

الكمبوند بتاعى نفسى يكون في أى قرية مصرية ... بدون اسوار ولا امن ولا حمامات سباحة ... جيرانى فيه فلاحين مصريين طيبين

متعتى فيه في جولة بين الحقول مع واحد من الحيوانات التلاتة

لا ضوضاء ولا دخان .... انام بعد العشا واصحى الفجر ولما ازهق من القراءة اقضى بعض الوقت مع الحيوانات التلاتة

الهواء هناك ريحته حلوة .. ريحة الزرع لما يختلط بريحة الخبز في فرن بلدى او ريحة حلة محشى على كانون بالحطب واعلى صوت تسمعه صوت شوية بط ووز بيلعب في الترعة

هو ده الكومبوند الصح مش تقولى بتاع الاعلان

احلى كوموند انك تعيش بين ناس تحبك وتحبهم .... تسلم عليهم بحب لما تشوفهم ويبتسموا في وشك لما يقابلوك ..... مش هاتلاقى ده الا في قرية مصرية  

متطرف جدا / سوريا والسوريين

انا متطرف جدا / سوريا والسوريين

اولا انا باكتب الكلام ده للمصريين ... المصريين بجد واللى بيحبوا مصر مش للى نفسهم مصر تقع عشان رئيسها مش مرسى ولا عشان رئيسها عسكرى

ثانيا اصحاب القلوب الطيبة بخيابة قلب خالتى ام سيد يمتنعون لان الكلام مش ها يعجبهم

انا زرت سوريا عدة مرات وعشت فيها فترات والسوريين كانوا معايا في غاية الاحترام بس خلى بالك انا كنت بازورهم ليه وطول بالك معايا شوية

في سنة 94  كنت بازورهم كمستشار فنى لحل مشكلة اطرافها خامات مصرية ومصنع سورى اردنى مشترك مقام في سوريا ورحت لهم برفقة مسئول اردنى رفيع من عمان لسوريا بالسيارة ويومها قابلونى بمنتهى الحفاوة ولكن بعد جولة في المصنع لعدة ساعات اكتشفت عيب في ماكينة كبيرة تؤدى لظهور عيب في المنتج وطلبت منهم الاذن انى اعيد برمجة الماكينة وتغيير بعض القيم وباذن الله العيب يختفى لكن اللى حصل ان الوجوه اصبحت متجهمة جدا ونصحونى بلطف انى ابدا العودة لعمان على الفور لطول الطريق !!!

في سنة 98  كنت موفد من شركة نمساوية لتركيب مصنع وتدريب العمال السوريين على تشغيله وكانت عائلتى معى لطول فترة الاقامة وبصراحة كانوا معانا في منتهى الكرم والحفاوة

في سنة 2005  كنت موفد من شركة سعودية لتأهيل بعض المصانع السورية لانتاج سجاد بشراكة سعودية للتصدير الى ليبيا لمنع دخول المنتجات السعودية الى ليبيا وقتها وكانوا ايضا في منتهى الكرم والحفاوة

ها تلاحظ انى كنت محط كرم وحفاوة بس خلى بالك انا كنت هناك لفائدة لهم في صناعتهم ولم اكن هناك كمستثمر او موظف

نسيت اقول لك لما كنت بابنى المصنع كنت باخد اجرى بالدولار والسكن في فيلا فخمة وبعد المصنع ما اشتغل صاحبه عرض عليا اشتغل مديره براتب ربع الاجر السابق وبدون سكن وبالليرة السورية

....................

غبت عن مصر فترة ولما رجعت الايام دى لقيت السوريين في مدينتى بالالاف وفى كل المجالات ... مطاعم وورش ومحلات خضار وملابس وحتى الحلاقين والكوافيرات

لاحظت شوية حاجات يمكن انت تقول عليها تافهة

مفيش محل منهم بيشغل عمال مصريين ... كلهم عمالة سورية

الزباين مصريين وسوريين طبعا لان مفيش سورى بيشترى من مصرى الا لو مفيش  مثله من السوريين

لو محلين لهم نفس النشاط وجنب بعض هاتلاقى السورى شغال بنشاط وحركة والمصرى بينش ... مش لان المصرى وحش ولا معاملته وحشة لا لكن لان السوريين بيشجعوا بعض بالاضافة لبعض المصريين من ذوى القلوب الخايبة اللى عاوزين يساعدوه وكمان البعض اللى بيشترى منه لان حركة المحل بتخلى بضاعته متجددة

مش مهم بقى المحل المصرى يفلس او يتحرق بجاز المهم ان اخوتنا السوريين غلابة يا ولداه واحنا طيبين اوى واكرم منهم

........................

اوعى تقول لى السورى شاطر او غلبان او الراى الخايب بتاع السورى شغال في مصر بفلوسه

ابقى افتكر كلامى بعد عشر سنين وقول الله يرحمه لما السورى ياخد فلوسه وفلوسك اللى ربحها منك ويرجع بلده

وبرضه ابقى قول الله يرحمه لما تيجى تشغل ابنك وتلاقى اغلب اصحاب الاعمال سوريين والادارة سورية واحنا عندهم عمال وبس

مش باقول لك انا متطرف اوى لاهل بلدى .... دى لو فضلت بلدنا

شيخ مش متربى

شيخ مش متربى

انا محتاج اتربى من اول وجديد

بصراحة الناس بتوع المسلسلات تعبوا منى ومن امثالى لما اعترضنا على مسلسلات وافلام البلطجة والاغتصاب والمخدرات وقلنا ان مصر مش عشوائيات بس وكانهم سمعونى وقالوا حاضر ها نجيب لك تشكيلة معتبرة

اله الوساخة عند البلطجية محمد باشا رمضان وشخصيتين اهو يا عم واحد متعلم وامتياز في الجامعة لكن يا خسارة مش نافع للنيابة

والتانى بلطجى وفيلسوف صاحب الحكمة الشهيرة اللى اوله كفتة اخره سيخ وطبعا لازم يدونا امل ان التعليم ماجابش فايدة واللى هايخلص هو البلطجى

زعلان من البلطجة ؟ ولا تزعل ها ناخدك مناطق الفيلل والقصور اهو ياعم وكلهم ناس مستحمية وحاطة كالونيا .... مش مهم بقى العهر والفجر والخيانة والقتل والجنون هو احنا ها نجيب لك ناس نضيفة وكمان عاوزهم محترمين ؟ اما راجل اهبل بصحيح

طيب بص يا سيدى ادى ابو البنات اهو راجل مستحمى ومعاه صافيناز تدلعك شوية اهو ايه رايك بقى ؟؟؟؟

ومش ها نحرمك من شوية تفاهة كمان عشان تستكيف على الاخر التافه الاعظم كل يوم بيولع في اصحابه اهو عاوز ايه تانى

تشكيلة فاخرة اهو من البلطجة والوساخة والخيانة والجنون والتفاهة وهز الوسط  عاوز ايه تانى

يعنى لو ممكن يعنى اى حاجة عن مكارم الاخلاق

انفجروا في الغضب وقالوا لى اسفوخس عليك راجل شايب وعايب ... مكارم اخلاق في رمضان يا اهبل ؟ عاوز صيام بالنهار واخلاق بالليل يا متخلف ؟

مش باقول لكم انا محتاج اتربى من اول وجديد

ربنا يرحمنا جميعا 

هلوسة شيخ

هلوسة شيخ

( الشيخ هنا معناه رجل كبير في السن ففى اللغة الرجل المسن هو شيخ والمرأة المسنة هى عجوز )

انا معرفتش اسميها ايه .. قصة والا رغى فاضى والا جولة في الماضى والا ايه بالظبط ملقيتش الا انها مجرد هلوسة من واحد دماغه شكلها ها تفوت المهم لو ها تقراها ركز في عداد السنين

لما جلست قدام الكمبيوتر كنت ناوى اكتب رسالة لرئيس الجمهورية لكن الصفحة كانت مفتوحة على الفيس بوك وشفت بوست لواحد قريبى هو الدكتور بهاء جابر وكان هو سبب الكارثة اللى انا باكتبها دى

اولا الدكتور بهاء هو تقريبا الوحيد من عائلتى اللى لسة باتواصل معاه طبعا غير اخواتى البنات ..... والدته تبقى بنت عمتى يعنى المفروض في مقام اختى لكنها في الحقيقة في مقام امى ويعلم الله انها في منزلة امى لحبى الشديد لها ووالده رحمه الله هو الاستاذ جابر حافظ ... أكثر شخص له تأثير في حياتى فهو الاستاذ والمعلم والشيخ والقدوة

المهم اثناء نظرى الى بوست الدكتور بهاء وجدت تعليق من بنت خالته ايناس ... تعليق عادى لكن فتحت صفحتها يمكن اشوفها لانى مشفتهاش من وهى في الابتدائية يعنى من ييجى 30  سنة !! لقيت صور لها ولاولادها شباب زى الفل ربنا يبارك لها فيهم ولقيت كمان صورة لوالدتها ... بنت عمتى الصغرى احلام العتبانى وقعدت ابص للصورة وافتكر امتى اخر مرة شفتها كانت اخر مرة في يونيو 1993  على جبل عرفات في الحج قابلتها صدفة يومها مع زوجها في حج هذا العام وبعدها بيومين زرتهم في خيمتهم في منى واتكلمنا شوية وماتقبلناش تانى  يعنى لا شفتها ولا كلمتها من 23 سنة

وفتحت صفحة احلام بنت عمتى لقيتها حاطة صورة اخوها الصغير طه العتبانى الله يرحمه توفى من ييجى سنتين .... طه كان اكبر منى سنتين لكن كنا تقريبا اصحاب وكانت اخر مرة اقابله فيها سنة 2006  يعنى من عشر سنين .... اخدت جولة في صفحته وشفت بوستات كان كاتبها الله يرحمه ايام الثورة وايام مرسى

ودى اول مرة اشوف صفحته على الفيس بوك والغريب ان كتير من اصدقاء طه باعتين له رسايل تهنئة بعيد ميلاده بعد وفاته ... اه والله صور تورتة وكلام تهنئة من كام شهر يعنى بعد وفاته بسنين .... اصدقاء الفيس

من صفحة طه دخلت على صفحة اخوه الكبير الدكتور عادل العتبانى ابن عمتى  الكبير  وهو صديق عندى باشوف بوستات بيكتبها ولكن تواصلنا على الفيس قليل وافتكرت اخر مرة قابلته فيها واتكلمنا سوا كانت في ابريل 2004  يوم وفاة والدى لما اخدنى اتغدى في بيته يعنى من ييجى 14  سنة  وعلى صفحته شفت صور بناته ربنا يبارك له فيهم كانت اخر مرة شفت بنته الكبيرة انجى من اكتر من 30 سنة

واسال نفسى ياترى ليه الدنيا عملت فينا كدة ... ليه ابن عمتى اللى كنا عايشين مع بعض في عمارة واحدة ولسنين طويلة كنا تقريبا بنتقابل كل يوم بقيت اقول انى مشفتوش من سنين ... ياترى العيب فين في الناس والا في ظروف الحياة والا في تربيتنا اللى لم تحافظ على ارتباطنا رغم ان ابويا وابن خالته اللى هو والدهم وجوز عمتى في نفس الوقت مفترقوش لاكتر من 60  سنة ومفرقهمش الا الموت

انا هنا كتبت بعض الاسماء يمكن حد منهم ييجى صدفة ويشوف كلامى بعد سنين وبعد موتى وجايز وقتها يقول الله يرحمه

ربنا يرحمنا جميعا